Ginpasalig sang chairman sang committee on transportation sa Sangguniang Panlungsod sang Bacolod nga ipalab-ot niya sa alkalde sang ciudad kag sa pinuno sang Bacolod Traffic Authority Office ang reklamo sang mga driver sang southbound jeepneys nga gina-obligar subong nga maglabay sa Vendors Plaza.
Kadungan sang pagprotesta sa Pope John Paul II Tower, gintipon man ni City Councilor Dindo Ramos ang sentimyento sang mga driver nga nagabyahe Sum-ag Central Market, Punta Taytay Central Market, Singcang Airport Central Market kag Magsungay Central Market.
Kalakip diri ang bayolasyon sa ila prangkisa bangud tubtub gid lamang sa Central Market ang ila destinasyon antes magbalik sa ila point of origin kag ginadumilian man sila nga magpick up sang pasahero sa SM City bangud magakadto gid sa terminal sa tupad sang Vendors Plaza ang magasakay.
Indi man sarang makapasaka sang pasahero sa iban nga dalan kundi sa terminal lamang.
Ginareklamo man sang mga driver ang dakpanay sa una nga adlaw sang traffic experimentation.
Suno kay Ramos, balansehon lang niya ang reklamo bangud indi tanan nga reklamo ang kumpormehan.
Sa sini nga paagi, maserbehan ang kaayuhan sang publiko.
Suno kay Sentrong Samahan ng Tsuper at Operators sa Negros (SSTONE) secretary-general Jessie Ortega, ipaiway lang kuntani anay sang BTAO ang pagpangdakop sa una nga semana sang traffic experimentation kundi edukaron anay ang mga driver.
Sa karon, masobra na isa ka gatos ka drivers ang gindakop kag ginmultahan bangud sa establishing illegal terminal kag obstruction bangud nagpasakay sang pasahero sa indi loading area.
Suno diri, wala sila nagapamatok sa traffic experimentation bangud gintuman man nila ini apang indi lang kuntani paglimitahan ang mga lugar sa diin sarang makapasaka sang pasahero.
Ginsuhestiyon sang Federation of Bacolod City Drivers Association (FEBACDA) sa alkalde sang ciudad nga pasadyahon ang Vendors Plaza kada gab-i bangud madamo pa man ang nagabyahe nga jeep nga sarang masakyan sang mga bumalakal.
Nag-upod man ang mga miyembro sang FEBACDA kaangay sang mga nagabyahe sang Sum-ag Central Market sa protesta nga ginpatigayon sa Pope John Paul II Tower sa reclamation area.
Suno kay FEBACDA secretary-general Elizabeth Catalbas, wala sila nagaprotesta sa pinuno sang Bacolod Traffic Authority Office kundi sa mga traffic enforcers nga nagapangdakop sa mga PUJ drivers nga wala nakahibalo sa traffic experimentation kag nagadiretso dulhog sa dalan Rizal halin sa dalan Gatuslao.
Suno kay Catalbas, kuntani hatagan sang isa ka semana nga information dissemination ang mga PUJ drivers bangud madamo sa ila ang wala nakahibalo sa traffic experimentation.
Paathag sini, indi nagakaangay nga dakpon ang mga PUJs nga indi maglabay sa terminal sa tupad sang Vendors Plaza bangud magutok ang lugar sa kadamuon sang mga jeep, sa baylo magapundo lang sila diri kag magabiya makalipas ang lima ka minutos.
Suno kay Catalbas, mas maayo kun may night market sa Vendors Plaza agud magsadya bangud may byahe pa man ang mga jeep tubtub magtungang gab-i.
