BACOLOD CITY — Tuman ang pasalamat sang Negros Occidental Little League seniors sa Filipino community sa Estados Unidos nga nagbulig sa ila samtang nagasabak sa Little League Seniors Division Softball World Series nga nagtakop sang Lunes sang kaagahon.
Sa exclusive interview sang Bombo Radyo sa player number 8 nga si Chastene Jover, ginpahayag sini nga madamo sang mga Pinoy nga nagsuporta sa ila pinaagi sa paghatag sang pagkaon kag pag-cheer samtang sila ang nagahampang sa field.
Ginhatagan man sila sang gamay nga party pagkatapos sang championship match apisar pa nga silver medal lamang ang ila nakuha.
Ginpasalig man sini nga iga-improve pa nila ang paghampang sa masunod nga tinion bangud wala sila nakahanot sang husto sa pag-atubang sa host team nga Delaware.
Suno diri, ginhimo nila ang kutob sang ila masarangan apang nalutos kontra sa mga Americano.
Lubos man ang pasalamat ni Coach Tony Oquindo sa mga opisyal sang provincial government sang Negros Occidental sa suporta nga ginhatag sa ila.
Suno diri, ini ang labing una nga kahigayunan sa senior league history sang probinsya nga nakalab-ot sa finals sang World Series.
Ginpasalamatan man sini ang Bombo Radyo Bacolod sa pagtutok sa ila nga hampang, halin sa panugod tubtub nga natapos.
