Pilason ang magpakaisa matapos gintiro sang duha ka mga suspect sa Sitio Nasanagan, Barangay Bi-ao, Binalbagan, alas- 9:00 sang Biyernes sang gab-i.
Ginkilala ang mga biktima nga sanday alyas “Joey”, 32-anyos, kag alyas “Elmo”, 33-anyos, lunsay lalaki, single, kag laborer.
Samtang ang suspect ang ginkilala nga sanday alyas “Ken”, 29 -anyos, lalaki, single, kag alyas “Aldo”, legal ang edad, nga lunsay mga residente sang nasambit nga lugar.
Sa interview sang Bombo Radyo kay PMaj. Joey Mara, Officer in Charge sang Binalbagan Municipal Police Station, samtang naga-inom sang makahulubog nga ilimnon si Joey upod ang iya pakaisa nga si Elmo sa gwa sang iya balay, hinali lang nga nag-abot si Ken.
Ginkomprontar sini ang magpakaisa kag ginpamangkot kun sila ang nagpanghaboy sang bato.
Nagpamalibad ang mga biktima tubtob nga may nagluntad nga komosyon sa tunga sang suspect.
Makaligad ang pila ka minutos, hinali lang nga ginitiro ni Ken sang wala pa matumod nga armas-luthang si Joey kag naigo sa nawala nga bahin sang iya tiyan.
Kasunod sini, gintiro man ni Aldo si Elmo kag naigo sa duha niya ka tiil.
Gilayon nga nagpalagyo ang mga suspect matapos ang krimen.
Suno kay Mara, pareho nga naka-inom sang makahulubog nga ilimnon ang mga biktima kag mga suspect.
Padayon naman nga ginabulong sa ospital ang magpakaisa.
Suno diri, ginpadulongan sang mga kapulisan ang balay sang mga suspect apang ginhambal sang mga iloy sini nga wala pa nakapauli ang ila nga bata.
Kaso nga frustrated homicide ang ipasaka batok sa mga suspect.
Ginapanawagan ni Mara sa pumuluyo nga makig-angot sa kapulisan kun may nahibaluan sa lokasyon sang mga suspect.












