Patay ang 41 anyos nga garage utility matapos ginbuno sa Banaba Street, atubang sang Trinity School sa Villa Angela Subdivision; Brgy. Villamonte, Bacolod City kagab-i.
Ang biktima ang ginkilala nga si Rolly Magbanua, residente sang Barangay Sibucao, San Enrique, Negros Occidental.
Ang suspetsado ang ginkilala naman nga si Norberto Pagunsan, 32 anyos, single, residente sang Purok Balatong, Brgy. Elijan, Bago City, Negros Occidental.
Sa inisyal nga imbestigasyon, ang duha upod kay Jerran Reyes, 32 anyos, nga residente naman sang Central Ma-ao, Barangay Ma-ao, Bago City ang maykaupod nga naga-inom sang makahulubog nga ilimnon tubtob nga may-ara sang pagbina-isay sa duha.
Suno kay Reyes, ginhambal sang suspect sa biktima ang “pakaisa mo tirahon mo!” kag ini ang iya man gilayon nga gintapungol.
Gintinguhaan naman ni Reyes, nga nagserbe nga witness, nga tambagan ang away apang sa ulihi, naghunos sang patalom si Pagunsan kag ginbuno si Magbanua nga nakaangkon sang samad sa nawala nga ilok kag likod.
Ang biktima ang ginhingagaw pa sa Corazon Locsin Montelibano Memorial Regional Hospital apang gindeklarar na nga dead on arrival.
Sa karun ang suspect ang nakahunong na sa Bacolod Police Station 4 matapos boluntaryo nga nagsungka.
