Nagpasalig si Bacolod City Administrator Em Ang nga magahimo sang tikang ang ciudad agud manabat ang nag-organize sang “party” ukon pagtililipon sa Art District, Brgy. Mandalagan, Bacolod City apisar sang COVID-19 pandemic.
Ini matapos may magpadala sang video kun sa diin makit-an nga nagasinadya ang pila ka mga persona sa nasambit nga lugar, wala nagasuksok sang face mask, face shield kag wala naga-obserbar sang social distancing.
Sa interview sang Bombo Radyo kay Ang, ginpahayag sini nga magahimo sang tikang ang Bacolod City Government bangud paglapas sa City Ordinance nga nagamando sa pagsuksok sang face mask kag face shield sa pampubliko nga lugar ang ila ginhimo.
Magluwas diri, may ginapatuman man nga liquor ban kun sa diin wala ginapahanugutan ang pag-inom sa pampubliko nga lugar.
Gindugang man sini nga ginadumilian man ang mass gathering.
Gani suno sa city administrator, ila na ini napalab-ot sa igtalugpangod sang Regional Office sang Department of the Interior and Local Government subong man sang local DILG kag ginsiguro nga manabat gid ang nag-organisa sini.
Suno sa iya, nakaschedule naman ang Business Permit kag Licensing Permit sa pagbisita sa mga establishmento subong nga adlaw.
Suno kay Ang, indi nila luyag nga matabo pa ang nasambit nga insidente bangud ginahimo sang gobyerno ang tanan agud nga matapna ang COVID apang kun padayon nga may magpasaway, mabutang lang sa kanugon ang pagpangbudlay nila kag sang mga frontliners.
Samtang, gilayon naman nga nagpadulong sa lugar ang mga personnel sang Bacolod Police Station 3 matapos may nagpadulong nga concerned citizen agud ireport ang pagtililipon.
Suno kay Police Capt. Richard Fajarito, gilayon nga ginkadtuan sang mga pulis kag patrol ang Art District agud mapauntat ang “party” kag ginwarning sang mga ini ang mga nagabaligya sang ilimnun.
Suno kay Fajarito, pag-abot sang mga pulis, naglinapta naman ang mga kabataan nga nagasalalaot.
Nagpang-abiso man ini sa mga baligyaan sang ilimnun nga indi magserbi sang alcohol ukon magpa-inom sang customer bangud santo sa pagsulundan sang General Community Quarantine (GCQ), ginadumilian ang pag-inom sa publiko kag sarang lang nga makabakal sang alcohol halis alas 12:00 sang udto tubtob alas 6:00 sang gab-i.
