Patay ang ginaalegar drug personality matapos gintiro samtang nagasakay sa iya tricycle sa Brgy. Vista Alegre sa ciudad sang Bacolod, alas 12:35 ang takna subong nga hapon.
Sa interview sang Bombo Radyo Bacolod kay Punong Barangay Jose Maria Leandro Norberto De Leon, ginpahayag sini nga nakita sang Barangay Tanod ang pagtiro sa biktima nga si Sunny Flores Jr. samtang nagapungko ini sa tricycle kag gilayon man nga naglakat ang suspetsado samtang nakatakdong sang tuwalya.
Suno diri, nakabati sang tatlo ka mga lupok ang barangay tanod kag wala naman ini nagresponde bangud wala ini sang armas kag nahadlok man ini nga masalabat.
Gin-ako sini nga drug surenderer man ang biktima kag ginapatihan nga druga ang sa likod sa pagpatay sa iya.
Sa karun, nagapadayon ang imbestigasyon sang kapulisan sa nagluntad nga krimen.
