BACOLOD CITY — Sa pihak sang pagduso ni Mayor Jose Nadie Arceo nga ilisan ang hepe sang kapulisan sa banwa sang Hinigaran, nagasaludo sa gihapon ang mga pumuluyo diri kay Police Senior Inspector Lawrence Gerald Bathan.
Personal nga nagpadulong sa estasyon sang DYWB ang tatlo ka mga indibidwal nga lunsay taga-Hinigaran kag nagpabutyag nga nagadayaw sila sang performance ni Bathan, ilabi na sa kampanya sang Hinigaran Municipal Police Station kontra sa ilegal nga druga.
Pagbuyagyag sang mga ini, ginakibang ang ila mga kasimanwa bangud sang indi husto nga patakaran sang ila alkalde, ilabi na ang pagpati-pati sini sa iya mga advisers.
Suno sa wala nagpahingalan nga Hinigaranon, basta na lamang ginapadakop ni Mayor Arceo ang sin-o man nga itudlo sang iya mga adviser kag ginapatu-patuan.
Suno sa iya, nagakahadlok sila nga may mga inosente nga mapapriso bangud gid lamang nga nagpati ang alkalde sa ginhambal sa iya.
