Ginpahayag sang Filipino sa Texas, USA nga ang may mga criminal record ang target sang deportation kadungan sang pagpatuman sang crackdown ni US President Donald Trump.
Sa interview sang Bombo Radyo Bacolod kay Noor Moraña, natural lamang nga makulbaan ka bisan dinn ka man nga bahin sang kalibutan kun ikaw ang isa undocumented nga nagatrabaho ukon nagatinir sa isa ka pungsod.
Apang gin-athag ni Morana nga ang mga ginadakop sang US government sa karun amo ang may criminal records agud nga dal-on pauli sa ila nga mga pungsod.
Suno diri, ang mga Filipino ang indi illegal nga nagsulod sa Estados Unidos bangud ginsiguro sang mga ini sang nagakaigo nga mga dokyumento antes antes magpadulong sa nasambit nga pungsod.
Ginpahayag man sini nga indi lang malikawan nga may yara sang mga nagaoverstay bangud bisan legal ang pagsulod didto kun kaisa ginahatagan lamang sang tatlo ka bulan nga valid nga makatinir bilang validity sang visa kag ang iban ang nagapaslawan nga makakita gilayon sang trabaho kag makakuha sang working visa gani nagapanago ang mga ini kag sila ang makabig nga undocumented kag illegal nga nagatinir sa nasambit nga pungsod.
Suno kay Morana sa 11 million nga illegal immigrants sa tion sang pagpamuno ni Joe Biden masobra 600,000 diri ang may mga criminal record nga amo ang target sang administrastyon ni Trump nga dakpon kag ideport sa ginhalinan nga pungsod.
