Ginapakamaayo sang Presidente sang Homeowners Association sang isa ka subdivision nga apektado sang ginaconstruct nga Handumanan-Cabug Road, nga gilayon nga ginsolusyonan ang ila reklamo sa alagyan.
Ini matapos nga gindangop ni Michael ‘Macky’ Apas sa Bombo Radyo Bacolod kahapon ang issue kun sa diin madamo sang mga nagaguot sa alagyan pasulod sa One Communities South Hill Subdivision.
Suno kay Apas, nakibot ini sang mahibaluan nga gilayon nga ginsemento ang dalan sa atubang sang entrance sang subdivision kahapon sang hapon.
Ginpahayag naman sa ila nga may mixture nga gingamit ang contractor agud magmala ang semento sa sulod lamang sang pito ka adlaw.
Apang ang dalan ang may ara pa sang gap, nga ginapahayag butangan sang drainage.
Sa karun sila ang makalabay sa natuo nga bahin sang dalan bangod medyo mabakod ang duta, apang sa nawala nga bahin, magaguot gid ang mga salakyan.
Nahibaluan nga ang construction sa Handumanan-Cabug Road nga may kalabaon nga 1.3 kilometers ang gin-umpisahan Abril 2024 kag nakaschedule nga matapos sa Setyembre 2025.
Apang indi naman masarado ang dalan agud matayuyon ang construction bangod ini ang ginalabayan partikular na sang mga gikan sa subdivision, kag nagaka-untat man ang pagsemento bangod sa masami nga pag-ulan.
Pahanumdom na lamang ni Apas sa mga contractor nga antes magbakbak sang dalan, dapat man anay nga ikonsiderar ang mga residente sa lugar nga mahimo magpenetensya.
