Madamo na kita sang mga nabatian nga insidente sang hold-up, apang nakabati na bala kamo sang mga armado nga hold-upper apang mga panapton lang ang target sa pagpangawat?
Ginkawat sang duha ka mga armado nga persona ang isa ka manugtahi nga Pakistani sang masobra 200 ka mga outfits nga ginhuman sini para sa mga customers antes ang Eid’l Fitr holiday, nga simbolo sang pagtakop sang Ramadan.
Nahibaluan nga ang Pakistani tailor ang ginhigot sang mga gunmen samtang ginpangkastigo naman ang iya nga mga tinawo.
Ginpahayag ni Muhammad Razzaq sang Biyernes nga duha ka armado nga lalaki ang nagsulod sa iya nga tindahan sa Islamabad antes paman sini matapos ang 240 nga shalwar kameez outfits nga malapit nalang matapos.
Ang shalwar kameez amo ang national dress sa Pakistan.
Suno kay Razzaq, wala pa sang nakita nga ebidensya ang mga kapulisan nga mahimo makatudlo sa kun sin-o ang mga wala sang kaluoy nga mga lalaki nga naghimo sang Eid’l Fitr agud mangin bangongot.
Ang nakuha nga mga panapton ang nagabalor masobra 720,000 rupees ukon kapin 4,000 dollars kag kapin tunga sa milyon ka pesos sa Pilipinas.
Masami ginaselebrar sang mga Pakistanis kag Muslim sa bilog nga kalibutan ang Eid’l Fitr holiday suksok ang bag-o nga panapton kag alahas, nga human sa maanyag kag naga-idlak nga desinyo.
Apang bisan mga pigado ang nagatinguha nga makabakal sang bag-o para sa okasyon, samtang mas barato naman ang mga tailor-made outfits kun ipaanggid sa mga mabakal sa tindahan.
Ang Eid Festival ang ginpatigayon sang Lunes, Mayo 2 kasunod sa sighting sang new moon.
Kalabanan sang mga shelves sa shop ni Razzaq ang gin-ubos gani nagakasubo nalang ini samtang nagapungko sa iya nga sewing machine.
Suno diri, siya ang nagatrabaho na sa lugar sa sulod sang 20 ka tuig kag may mga customers nga nagabalik-balik kun sa diin madamo sang gikan sa posh areas sang Islamabad kag Rawalpindi sa diin makita ang mga branded kag malahalon nga mga tela.
Suno kay Salman Ashraf, isa sa mga manugtahi nga ginhigot sa natabo nga pagpanulod ang nagpahayag nga tuman ka agresibo sang mga kawatan kun sa diin sila ang ginwarawara sang mga ini, ginhigot gamit ang lubid kag ginpanugyanan nga maghipos.
Ginkumpirmar naman sang kapulisan nga gina-imbestigahan na sang mga ini ang insidente.
