Gintindugan ni Bacolod City Councilor Homer Bais, chairperson sa Committee on Environment and Ecology sa Sangguniang Panlungsod nga wala sang kaangtanan sa Waste to Energy Project ang ginbawi nga request sang Victorias City Government sa paghaboy sang residual waste sa Bacolod Sanitary Landfill.
Sa interview sang Bombo Radyo Bacolod kay Bais, personal nga ginpadulungan ni Victorias City Mayor JunB Bantug si Bacolod City Mayor Greg Gasataya para bawion ang request matapos ang pagreklamo sang pila ka pumuluyo sa Brgy Felisa.
Apang ginklaro sang konsehal nga personal request lamang ni Bantug ang paghaboy sang basura sa Bacolod bangod ginakay-o pa ang ila nga landfill.
Suno diri sang Nobyembre 2025 pa sang nagrequest si Bantug apang karun lamang na-akumodar ni Mayor Greg sang manugtapos na ang Cell No. 5.
Ang request ang tuhoy lamang sa paghaboy sang 8 cubic meters sang residual waste ukon isa ka mid-size compactor truck kada adlaw sa sulod sang isa ka tuig, nga tuman lang ka gamay.
Suno diri, ang pagtukod sang planta para sa Waste to Enery Project ang ginalantaw nga magalawig sang tatlo ka tuig.
Samtang ang mga gamiton nga basura bilang gatong ang mga bag-o nga basura, gani malayo nga kutkuton pa ang nalubong na sa sulod sang masobra duha ka tuig para gamiton sa proyekto.
Samtang tuman man ka gamay sang ihaboy kuntani sang Victorias City nga basura para sa requirement nga gatong sa pag-operate sang planta.
Suno diri, nagset na kuntani si Councilor Al Victor Espino, chairman sa Committee on Laws and Ordinances, sang public hearing sa Hulyo 14, apang bangod ginbawi na ni Bantug ang request, wala naman sang rasun nga magpatawag pa sang meeting.
Nagalaom si Bais nga may natun-an sa hitabo, kag pahanumdom sini ang dapat ma-address amo ang matuod nga isyu sa basura, gikan sa collection tubtob sa paghaboy sang mga pumuluyo.
