Padayon nga nagapanawagan ang Alliance of Concerned Teachers sa salary increase para sa mga manunudlo.
Sa interview sang Bombo Radyo kay Josenito Makilan, ACT -Bacolod City president, dapat na nga I-increase ang sweldo sang mga manunudlo bangod nga tuman na kabudlay para sa ila nga palangabuhian ang manubo nga sweldo.
Suno diri, ang sweldo sang manunudlo indi lamang para sa sulod sang balay apang nalakip na diri ang gasto para sa maintenance, sa repair kag programa sang buluthuan nga ang manunudlo man kun kaisa ang naggasto gikan sa ila personal nga kwarta.
Dugang pa sini, ang trabaho sang manunudlo ang wala nagakatapos sa sulod sang walo ka oras, ini nagapadayon pa tubtob nga sila makapauli.
Nagapanawagan ini sa karun sa gobyerno nga pamatian ang ila nga hingyo sa salary increase.
Ginkwestyon naman sang representative sang ACT – Negros Occidental, nga paano nga wala sang increase sa sweldo sang manunudlo apang may increase sa mandatory contribution.
Sa interview sang Bombo Radyo kay Grace Abellar, kulang ang P27,000 nga sweldo sang Teacher 1 kag ini ang dapat nga mapasaka sa P50,000.
Suno diri, kun may kakulang sa budget ang manunudlo ini ang mangutang nga tubtob sa lima ka tuig antes mabayaran apang isa lamang ka bulan magasto.
Nagapanawagan ini sa gobyerno nga matulupangdan ang kinahanglan sang mga manunudlo nga may madamo sang trabaho apang wala sang budget.
Samtang, sa Biyernes may yara sang patigayunon nga martsa ang Act -Bacolod para sa panawagan nga salary increase.
