Nagpatigayon sang untat byahe ang pila ka grupo sang tradional jeepneys kasunod sa panawagan sang Nationwide Transport Strike sang National Transport Group nga MANIBELA humalin subong nga adlaw tubtob sa Miyerkules.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD), nakadepende sa drivers kag operators kun luyag nila mag-upod sa transport strike.
Suno diri, ang ila untat-byahe sa ciudad ang nagapakita sang ila suporta sa national transport group.
Pahayag sini, sila ang magapatigayon sang untat-byahe bangud sa sala nga datos nga ginpagwa sang Land Transportation Franchising and Regulatory Board kun sa diin ginapakita nga madamo na ang nag-upod kag nagpaconsolidate sa ginakabig sini nga palpak nga programa nga PUV modernization program.
Samtang, hulaton naman sang Kabakod Negros Transport Coalition Incorporated (KNETCO) ang mangin desisyon ni Department of Transportation Secretary Vince Dizon para sa mga unconsolidated jeepneys.
Sa interview sang Bombo Radyo Bacolod kay Lilian Sembrano, presidente sang KNETCO, sang Marso 21 nagmeeting ini kaupod si Dizon kag mga traditional groups kun sa diin nagpasalig ang DOTr secretary nga maghulat sang napulo ka adlaw antes ini makapagwa sang iya desisyon.
Suno kay Sembrano, ginalauman nila nga mangin pabor sa ila ang desisyon ni Dizon samtang sila ang nagapadayon sa karun sa pagbyahe nga wala sang rehistro, wala sang isnurance kag wala sang prangkisa.
