BACOLOD CITY — Nagapatigayon sang motu proprio investigation ang Commission on Human Rights (CHR) sa Negros Oriental sa natabo nga pag-ambush sang ginapatihan mga rebelde sa mga katapo sang Guihulngan City Police Station sa Barangay Magsaysay, Guihulngan City tinalikdan nga semana.
Suno kay CHR Negros Oriental Head kag special investigator Dr. Jess Cañete, sa pihak nga wala sang tagreklamo, nagpatigayon sila sang pagpangusisa sa insidente bangud may mga sibilyan nga naulamid, partikular si Councilor Paulo Edison Dela Rita, ang driver kag ang bodyguard sini.
Suno kay Cañete, ang pagkaulamid sang mga sibilyan ang makabig na nga isa ka paglapas sa international humanitarian law.
Ang bentaha lang, suno sa CHR Negros Oriental head, amo nga may yara sila sang documentation nga sarang magamit bilang basehan sa ulihi.
Sa madumduman nga napatay sa amo ang ambush ang hepe sang Guihulngan Police Station nga si Police Supt. Arnel Arpon, subong man sanday SPO2 Necasio Tabilon; SPO2 Teovic Agosto; SPO1 Jesael Ancheta; PO2 Alvin Paul Bulandres; kag PO2 Alfredo Dunque; samtang, pilason naman sanday SPO4 Jerome Delara; PO3 Jordan Balderas; kag PO2 Joery Maribao.
Patay man ang driver ni Councilor Dela Rita nga si Michael Hambalos.