Nagfile si House ways and means panel chair kag Marikina 2nd District Rep. Miro Quimbo sang House Bill 8257 nga nagaduso nga mahatagan ang Presidente sang ikasarang nga magsuspende ukon buhinan ang excise tax sa mga produktong petrolyo sa tion sang krisis.
Gin-file ang house bill pila ka oras matapos ginpahayag ni Presidente Ferdinand Marcos Jr. nga naghingyo ini sang otoridad sa Kongreso agud mabuhinan ang fuel excise tax kun maglapaw sa 80 US dollars kada bariles ang presyo sang Dubai crude, ilabi na sa nagapadayon nga tensyon sa middle east.
Ang nasambit nga housebill ang mahimo mag-ammend sang Section 148 sang 1997 National Internal Revenue Code agud mapahanugotan ang suspensyon kun ang average nga presyo sang Dubai crude ang magdangat ukon magsobra sa 80 dollars kada bariles sa sulod sang tatlo ka asod-asod nga bulan ukon may ideklarar nga state of national emergency ukon kalamidad nga nagatuga sang tuman nga pagsaka sang presyo sang produktong petrolyo, nga sertipikado sang Energy Secretary.
Mahimo ipatuman ang suspensyon sang buwis sa petrolyo, bug-os ukon amat-amat nga pagbuhin, tubtob anum ka bulan kag indi maglapaw sa isa ka tuig.
Otomatik nga ibalik ang excise tax kun matapos ang suspensyon ukon wala na ang rason sini.
Ginatugyan sa Presidente, pinaagi sa Finance Secretary, nga magsumiter sang report sa Kongreso kada bulan humalin sa pag-umpisa sini kag ang posible nga epekto sa inflation, presyo sang petrolyo, kag iban pa nga aktibidad pang-ekonomiya.
