Nagadangat sa P8 million ang ginabanta nga halit sang sunog sa Java Pension House ukon ang anay Bascon Hotel sa corner Gonzaga-Locsin Streets sa ciudad sang Bacolod kun sa diin anom ang patay kahapon lakip na ang tag-iya.
Ini suno kay Fire Chief Inspector Publio Ploteña, City Fire Marshal sang Bacolod matapos nga ginbasehan ang mga affidavit nga natipon sang Bureau of Fire Protection (BFP).
Sa karun, indi pa matumod ni Ploteña kun aksidente ang sunog ukon ginhungod.
Ini ang kasunod sang mga reports kahapon nga may nakita nga mga motorsiklo nga ginsunog sa idalom sang building.
Santo man sa interview sang Bombo Radyo Bacolod sa wala na nagpakilala nga trisikad driver may nakita ini nga tatlo ka lalaki nga nagkuha sang helmet kag ginsindihan kag ginhaboy balik sa sulod sang building.
Indi pa man matumod sang City Fire Marshall ang gintunaan gid sang kalayo apang ini ang nagsugod sa groundfloor sang pension house.
Sa pag-usisa sang mga otoridad, ang anom ka mga nagkalamatay ang ginalakipan sang tag-iya nga si Christopher Java, anak sini nga si Miguel, 12 anyos; iloy nga si Magdalena; yaya nga si Ronalyn Dacalio; front desk/cashier nga si Arnold Filomeno kag isa ka wala pa nakilal-an nga lalaki.
