BACOLOD CITY – Halos anom ka libo nga sugar planters kag workers ang nagpatigayon sang protesta sa atubang sang planta sang Coca-Cola Company sa Barangay Mansilingan, ciudad sang Bacolod kaina sang aga.
Ini ang angot sa kampanya kontra sa high fructose corn syrup (HFCS) nga ginagamit sang higante nga softdrinks company sa baylo sang kalamay nga gikan sa tubo nga amo ang nagapanguna nga palangabuhian sa probinsiya sang Negros Occidental kag sa bug-os nga isla sang Negros.
Nagtambong sa protesta si Vice-Governor Eugenio Lacson kun sa diin ang bise-gobernador ang nagbasa sang manifesto of support sang Sangguniang Panlalawigan sa kawsa sang Sugar Alliance sa Negros.
Kadungan sini, ginsunog sang mga protesters ang effigy ni Agriculture Sec. Manny Piñol nga gintawag nila nga “Money Piñol” bangud sa panindugan sini batok sa Sugar Order No. 3 nga amo ang naga-regulate sa pagsulod sang HFCS sa pungsod.
Nahibaluan nga ginpahayag ni Piñol nga untaton ang pagpatuman sang Sugar Order No. 3 bangud wala makonsulta ang nasambit nga softdrinks company antes ini gin-aprubahan sang Sugar Board.
Ang protesta sang Sugar Alliance ang kadungan sang hearing para sa injunction nga ginhingyo sang Coca-Cola batok sa Sugar Order.
