Maulanon nga tiyempo ang ginatudlo nga rasun sa delays sa ginapatigayon nga construction sang Handumanan-Cabug Road.
Ini matapos nga nakabatun sang reklamo ang Bacolod City Engineer’s Office bangod sa pagbinaha kag paglutak sang lugar nga madugay na wala gihapon matapos.
Sa interview sang Bombo Radyo Bacolod kay Engr. Loben Ceballos, officer in charge sang Bacolod City Engineer’s Office, sa orihinal nga plano luyag kuntani nila nga isarado ang dalan agud deretso nga mapatuman ang road construction.
Apang bangod madamo sang nagalabay sa area kag may-ara naman sang mga pamalay, nagdesisyon ang contractor nga by phase na lamang ang paghuman sa dalan nga ginabaki baki nila sa kada lane.
Ang proyekto nga gin-umpisahan sang Abril 5, 2024 ang nagalaba sang 1.3 kilometers ang may budget nga P85 million kag ginalauman nga matapos sa Setyembre 27, 2025.
Ang dalan ang may duha ka lanes, apang kabahin man sa ila trabahuon ang sidewalk, solar street lights kag LED markings.
Pasalig ni Ceballos nga padayun ang road constructions, apang sila ang masami nga naga-untat sa pagbuhos sang semento ilabi na nga masami nga naga-ulan kada hapon.
Naghamtang naman sang dugang nga mga reflectorized warning signages agud malikawan ang mga aksidente kun gab-i kag nagadeploy man sang mga Bacolod Traffic Authority Office personnel sa lugar agud magderiher sang trapiko.
Ginalauman ni Ceballos nga dasigon man sang contractor ang trabaho kag indi hulaton nga malab-ot ang deadline.
