Tuman ang kakibot sang himata sang yaya nga si Ronalyn Dacallo nga nalakip ini sa anom ka mga nagkalamatay kadungan sang sunog sa Java Pension House kaina sang kaagahon.
Sang nabalitaan ang natabo, gilayon nga nagpadulong sa lugar sanday Maricel Dacallo, pakaisa ni Ronalyn; Mona Dacallo, iloy sang biktima; kag bata sini nga si Ruby.
Sa interview sang Bombo Radyo kay Mona, aminado ini nga madugay na nagatrabaho sa pamilya Java ang iya bata nga si Ronalyn.
Suno diri, pito pa lamang ka bulan si Miguel Java sang nagsugod si Ronalyn sa pagpangamo sa tag-iya sang pension house nga si Christopher Java.
Ang biktima ang ika-duha nga bata ni Ginang Dacallo kag pito sila nga mag-ululutod.
Si Ronalyn ang may duha ka mga bata kag isa diri ang nagatrabaho na sa barko samtang magulang naman si Ruby.
Emosyonal naman ang bata sang front desk/cashier sang nahibaluan sini nga nalakip ang iya amay sa mga nagkalamatay.
Suno kay Armond Filomeno, bata ni Arnold, malawig na nga nagatrabaho sa pension house ang iya amay.
Suno diri, alas 6:00 sang gab-i tubtob mag-aga ang duty sang biktima.
Si Arnold ang may lima ka mga kabataan.
