Nagalaom ang House Minority Leader nga sa pagbag-o sang liderato sa Senado magahulag naman ang mga malawig na nga napending nga House bill.
Sa interview sang Bombo Radyo Bacolod kay ACT Teacher’s Partylist Representative France Castro, aminado ini nga bisan sila ang nakibot sa pagkambyo sang liderato sa Senado.
Santo sa statement nga ginbuy-an ni former Senate President Juan Miguel Zubiri, wala sini nasunod ang mando halin sa ibabaw, gani ginalantaw ni Castro nga ini ang may kaangtanan sa mga isyu nga ginadiskusyunan sa Senado kaangay sa Charter Change kag PDEA leak.
Ginawelcome naman nila sa MAKABAYAN bloc ang pagpungko ni Senate President Francis “Chiz” Escudero, nga sa ila paglantaw may kaangay nila nga panindugan.
Aminado ini nga bangod sa pagbag-o sang liderato may matabo nga delays apang matapos sini ginalauman ni Castro nga ma-expedite na ang mga hagna gikan sa Kamara nga malawig na nga napending sa Senado.
Suno diri sa pagpamuno ni Zubiri, lain ang mga nangin prayoridad kag halos wala gintandog ang makabig pro-people nga mga hagna.
Aminado man ini nga malapit ang relasyon sang mga amay ni Escudero kag ni President Ferdinand “Bongbong” Marcos Jr. apang nagapati ini nga ang bag-o nga Senate President ang may kinaiya.
Dugang pa sini nga ang Executive, Legislative kag Judiciary ang magkaparehas sang lebel gani indi man dapat masandig lang sa luyag sang Presidente ang desisyon sang Senado.
