Ginpahayag sang Commission on Elections nga wala sang nareport nga untoward incident sa ikaduha nga adlaw sang filing sang certificate of candidacy sa bilog nga pungsod.
Suno kay Chairperson George Erwin Garcia, sa ikaduha nga adlaw, wala sila sang may nabaton nga maskin ano nga untoward incident ukon report nga nakaangkon sang problema sa maskin ano nga candidacy filing sites.
Nagapasalamat ini bangud nangin tuman ka malinong ang COC filing sa bilog nga pungsod sa ikaduha nga adlaw.
Suno kay Garcia, santo sa report sang Philippine National Police, zero crime incidents sa mga areas kun sa diin nahamtang ang candidacy filing sites sa una nga adlaw.
Suno naman kay Comelec spokesperson John Rex Laudiangco, may yara lamang sang power outage sa isa ka area sa Mindanao sa first day sang filing sang COC apang wala ini nakapauntat sa ahensya sa pagbaton sang mga aspiring political candidates.
Ang filing sang certificate of candidacy ang nagsugod sang Oktubre 1 kag magatakop sa Oktubre 8, humalin alas 8:00 sang aga tubtob alas 5:00 sang hapon.
