Iloy sa Calatrava, ginkompirmar nga ang bata napatay sa masakit

Mismo ang iloy sang tatlo katuig nga bata sa Calatrava ang nag-ako nga indi aswang ang nagpatay sa iya bata, baliskad sa una na nga mga huring-huring.

Sa pagpasikto sang hepe sang Calatrava Municipal Police Station nga si Police Major Rocky Desear sa iloy nga si Lyn Magbanua, gin-ako sini nga napatay ang iya bata bangud sang masakit sa corazon kag indi bangud sang aswang.

Suno kay Magbanua, wala sila naghambal nga aswang gid ang nagpatay sa iya bata kundi may nakita lang nga dako nga sapat ang iya bana nga iya ginlagas.

Madumduman nga una naglupok ang nasambit nga balita sa isa ka radio station kag gilayon naman ini nga gintawag sang hepe sang kapulisan sang Calatrava nga isa ka fake news.