Nagalain ang buot sang iloy ni Corporal Arnold Sumaribus, nga napatay ang iya bata indi bangod sa kasumpong sang gobyerno kundi ginpatay sang kaupod lamang sini nga suldado.
Madumduman nga napatay si Sumaribus ni Sergeant Charlemagne Nabejet matapos ang gina-alegar komosyon samtang sila ang naga-inom inom sa sulod sang military detachment sang 15th Infantry Battalion sa Brgy Manlucahoc, ciudad sang Sipalay, Negros Occidental sang Lunes sang gab-i.
Sa interview sang Bombo Radyo Bacolod kay Renalyn Sumaribus, kaagahon na sang ginsugid sang iya bata nga babayi nga napatay si Arnold.
Kasunod sini, gikan sa Iloilo sila ang gilayon nga nagbyahe padulong sa Negros Occidental kaupod ang asawa sang napatay nga suldado kag mga pakaisahan sini.
Pahayag sang iloy, una, sila ang nagderetso sa St. Peter Chapel sa Barangay Mambaruto, Sipalay City kun sa diin nahamtang ang bangkay sang iya bata kag wala pa niya makita ang suspect.
Wala man ini makatulog bangod sa kasakit nga nabatyagan.
Si Arnold ang subang sa lima sila ka mag-utod kag amo ang nagtindog nga amay sa ila pamilya sang nagtaliwan ang amay nila sang pito ka bulan pa lamang ang ila agot nga utod.
Nagabulig man ini sa pagpa-eskwela sang iya mga utod bisan pa nga may pamilya na ini nga iya.
Suno kay Renalyn, indi maglain ang iya buot kun ang iya nga bata ang napatay sa ngalan sang serbisyo ukon napatay samtang nagapakigbato sa kaaway sang gobyerno.
Apang sa baylo, ini ang ginpatay sang kaupod lamang sini sa serbisyo, gani luyag sang iloy nga ma-imbestigahan sang maayo ang matuod nga natabo.
