Padayon ang imbestigasyon sa pagtumod sa suspek kag motibo sa pagluthang sa 12 anyos nga lalaki sa Locsin-Cuadra Streets, sa Barangay 12, Bacolod City, sa tabok sang Bacolod City Public Plaza alas-2:40 kahapon sang kaagahon.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, nadakpan sadto ang biktima nga si Dean Rod Cepeda nga isa sa duha nga nagkuha sa lima ka tuig nga bata nga si Danica sa Purok Water Lily, Barangay Zone 10, Talisay City sang Hulyo 1 kag Hulyo 2 sang kaagahon na nakit-an sa La Salle Avenue, Barangay Villamonte, Bacolod City.
Apang si Cepeda ang gin-release sang Department of Social Services and Development (DSSD) bangod nga menor de edad ini samtang ang kaupod sini nga yara na sa legal nga edad ang yara sa kustodiya sang Talisay City Police Station.
Ginapatihan naman nga may deperensya sa paminsaron si Cepeda.
Suno kay Bonilla, kahapon sang kaagahon, ginkastigo pa ini sang rugby boys kag ini ang nagpahuway-huway kag nagtulog sa dalan sa tabok sang Bacolod City Public Plaza.
Didto na kag nag-abot ang suspect nga nakamotorsiklo kag nakahelmet nga nagluthang kay Cepeda.
