Gin-mandoan na sang pinuno sang Negros Occidental Police Provincial Office ang mga katapu sang Escalante City Police Station sang maid-id nga imbestigasyon tuhoy sa natabo nga pagtiro-patay kay incumbent SP member Bernardino “Toto” Patigas.
Sa interview sang Bombo Radyo Bacolod kay Police Col. Romeo Baleros, ginpahayag sini nga maga-koordinar ang kapulisan sa pamilya sang biktima agud hibaluon kun may yara sang naka-away si Patigas nga posible may ikasarang nga mag-papatay sa iya.
Naga-pangita naman sa karun ang mga otoridad sang posible mangin ebidensya kag testigo sa pagpatay sa konsehal.
Hugot man sa karun ang pag-patigayon sang check point operations sa tanan nga mga dalanon sang syudad nga posible gin-agyan sang suspetsado sa pag-palagyo matapos ang krimen.
Samtang, gin-athag sang Deputy chief of police sang Escalante City Police Station nga indi riding-in-tandem ang nagtiro-patay kay incumbent councilor Bernardino “Toto” Patigas, las-4:26 kahapon sang hapon.
Sa interview sang Bombo Radyo Bacolod kay Police Captain Ronald Santillan, isa lamang ka persona ang sakay sa motorsiklo nga naga-duag green nga nagsunod sa konsehal.
Suno kay Santillan, gikan sa proper sang syudad ang konsehal kag papuli na ini sa ila puluy-an sa Sition Cogon 1, Barangay Alimango sang siya ang ginsundan sang suspetsado.
Sang yara na sa Purok Highschool sang amo man nga Barangay, hinali lang gintiro sang suspek si Patigas sa likod kag sang natumba na ang biktima, gin-palapitan pa sang suspetsado ang konsehal kag liwat nga gintiro sa likod sang iya ulo.
May duha ka igo sang bala sa ulo si Patigas kag isa naman sa iya lawas kabangdanan sang iya gilayon nga kamatayon.
Padayon naman sa karun ang manhunt operation sang mga kapulisan batuk sa supetsado matapos nga nakapalagyo.
