-- ADVERTISEMENT --

Nagapadayon ang imbestigasyon sang 302nd Infantry Brigade sang Philippine Army sa nagluntad nga shooting incident sa military detachment sang 15th Infantry Battalion kun sa diin napatay ang isa ka suldado kag ang suspek ang kaupod man sini.

Madumduman nga patay ang isa ka miyembro sang 15th Infantry Battalion sang Philippine Army matapos nga gintiro sang kaupod sini nga suldado sa sulod sang military detachment sa Brgy Manlucahoc, ciudad sang Sipalay, Negros Occidental, sang Lunes sang gab-i.

Ginapahayag nga naga-inom inom sa sulod sang military detachment si Corporal Arnold Sumaribos tumandok sang banwa sang New Lucena, probinsya sang Iloilo kaupod si Sergeant Charlemagne Nabejet kag ginalantaw nga nagluntad ang komosyon sa tunga sang duha kun sa diin gintiro ni Nabejet si Sumaribos sa dughan nga gintunaan sang iya kamatayon.

Sa interview sang Bombo Radyo Bacolod kay Brigadier General Joey Escanillas, commander, 302nd Infantry Brigade sang Philippine Army, magluwas sa rason sang shooting incident, ginaimbestigaran man kun may yara ang mga ini sang ginlapas nga polisa kag pagsulundan ilabi na nga may napatay.

Suno kay Escanillas, naturn-over na sang Philippine Army sa kapulisan ang suspek agud nga mapasabat ang hinimuan sini.

-- ADVERTISEMENT --

Suno diri, duha ka kaso ang mahimo nga atubangon sang suldado ang administrative nga mahimo siya madischarge sa serbisyo kun mapamatud-an nga may ginlapas nga pagsulundan samtang ang criminal case ang ipasaka sa korte.

Nagahulat pa ang mga ini sang resulta sang ginapatigayon nga imbestigasyon.

Mahimo man manabat ang mga upod sang suspek nga suldado sang nagluntad ang krimen.

Nagpanugyan man ini sa mga tropa sang gobyerno nga likawan ang pag-inum sang makahulubog nga ilimnon sa detachment bangud ginadumilian ini.

Suno pa kay Escanillas, adlaw adlaw man ang mga ini ang ginapahanumdom sang mga polisa gani wala sang rason nga magahimo ang mga ini sang indi maayo nga butang.