BACOLOD CITY — Kumpirmado nga iya sang crew sang MV Shibumi nga amo ang ginasakyan sang seafarer nga si Michael John Abibiason sang Barangay Taloc, Bago City ang immersion suit nga nasapwan sa Kolosoha Village sa Sulawesi sa Indonesia kag may unod nga tul-an sang kamot sang tawo.
Ini ang ginkumpirmar mismo sa Bombo Radyo sang kapitan sang MV Shibumi nga si Captain Harvey Lazarte matapos nakita ang litrato nga ginpadala sang Indonesia Automatic Fingerprint Identification System (INAFIS) sa Bombo Radyo sang Abril 1.
Ang amo nga suit ang nasapwan sang isa ka mangingisda las 5:00 sang kaagahon kag sa karun yara na sa DNA Section sang Indonesia National Police sa Jakarta.
Suno kay Lazarte, wala sang iban nga barko nga pareho ang pangalan sa iya ginadumala.
Ang nasambit nga suit suno sa iya ang nakadesinyo para sa winter season kag indi maglugdang ang nagasuksok sini kun selyado ang zipper bangud may yara ini sang bouyant material.
Ugaling mahimo suno sa iya nga indi husto ang pagsuksok ni Abibiason sang ini ang naglumpat amo gani nga wala siya naglutaw kag wala nakit-an sang ginbalikan sang barko ang ila gin-agyan agud nga siya ang pangitaon sang Enero 17.
Sa pihak sini, wala pa sang kumpirmasyon kun si Abibiason gid man ang sa sulod sang suit samtang wala pa napatigayon ang DNA test sa pamilya sini sa Bago City.
Nahibaluan nga si Abibiason ang naglumpat sang Enero 16 sang gab-i kag ginapatihan nga nag-suicide bangud gin-akigan sang chief engineer bangud nakakomiter sang sala samtang nagaduty sa makina bilang engine cadet.
