Nakarecord sang 6,000 inbound passenger ang Philippine Coast Guard – Northern Negros Occidental kahapon, Miyerkules Santo.
Sa interview sang Bombo Radyo Bacolod kay Coast Guard Ensign John Hoffer Olis, public information officer sang PCG – Northern Negros Occidental, 6,200 ang narecord nga inbound passengers sa mga pantalan sa Negros Occidental kahapon doble nga mas mataas sangsa tinalikdan nga inadlaw nga yara lamang sa 3,000 passengers.
Samtang 5,000 naman ang narecord nga outbound travelers.
Ini ang gikan na sa nanarisari nga edad, apang kalabanan sa mga byahe ang mga nagatrabaho gikan sa iban nga lugar kag nagpauli lamang subong nga Semana Santa.
Pinakamadamo naman nga narecord nga inbound passengers ang gikan sa Iloilo.
Sa karun, yara sa heightened alert status ang PCG gani hugot ang ila pagbantay sa mga pantalan.
Sila ang nagapatigayon sang visibility patrol, may ginahamtang nga Malasakit Help Desk kag nagapatigayon man sang panelling ang K9 units.
Ang PCG ang nagakoordinar man sa iban nga ahensya kaangay sa Bacolod City Disaster Risk Reduction and Management Office sa pagpatigayon sang Coastal Security Patrol.
Panugyan ni Olis sa mga magabyahe sa kadagatan nga antes maghalin tsekyaron anay ang weather forecast agud indi mastranded sa pantalan.
Samtang mas maayo nga mag-advance booking naman sang hotel ukon resorts bangod madamo sang mga byahero ang nagaangkon sang kabudlayan ilabi na nga madamo sa mga hotel kag resorts ang fully booked na.
Bisitahon man ang facebook page sang PCG bangod dira sila nagapost kun may-ara sang cancellation sang mga sea trips.
Samtang sa mga magalagaw sa beach, dapat nga bantayan kun may kaupod nga kabataan agud malikaw sa insidente.
