BACOLOD CITY — Mismo ang management kag mga manunudlo sa Fortress College Kabankalan ang nagpamatuod sa kabakas kag pagka-outstanding ni Cadet First Class Fritz John Vallador sang estudyante pa ini sa high school.
Sa interview sang Bombo Radyo, emosyonal ang school director sang Fortress College nga si Raquel Dizon samtang nagadayaw kay Vallador.
Ang PNPA cadet ang nagtapos sa high school sadtong tuig 2011 bilang 1st honorable mention ukon ikatatlo sa honor roll.
Suno kay Dizon, nagakadapat lamang nga magbaton sang amo nga award si Vallador bangud matutom ini nga sahi sang estudyante kag madamo sang kinaadman.
Sang high school, si Vallador ang pambato sang amo nga eskwelahan sa tion nga may yara sang kompetisyon kag nagadaog man ini.
Sang ginpamangkot ni Dizon ang mga manunudlo sadto sang kadete, lunsay nalipay ang mga ini sa nalab-utan ni Vallador kag sila ang nagapati nga indi malayo nga mangin valedictorian ini.
Bisan ang mga classmates ni Vallador ang nagatangla man sa iya sadto.
Suno sa school director, nakahibalo ang bilog nga eskwelahan sang istorya sa kabuhi ni Vallador.
