Ginapangita pa sang otoridad ang suspetsado nga nagtiro sa tatlo ka mga babayi sa Sitio Pantao, Brgy. Pandan, Pontevedra, sang Enero 21 kun sa diin isa ang patay kag duha ang pilason.
Sa interview sang Bombo Radyo Bacolod kay Police Lt. Donny Magbanua, Deputy Chief of Police sang Pontevedra Municipal Police Station, may nabaton sila nga impormasyon may yara sang shooting nga nagluntad sa nasambit nga lugar kag naabtan pa nila ang tatlo ka mga biktima nga nagahigda.
Ginkilala ang mga biktima nga sanday Ana Oñas nga dead on the spot samtang pilason naman sanday Georgelyn Linigao, 51 anyos kag Josselino Duban, 55 anyos lunsay mga residente sang nasambit nga lugar.
Suno kay Magbanua, nagalakat ang mga biktima kag ginbantayan sang suspetsado nga ginkilala kay Pedro Oñas kag ginluthang.
Gindala ang mga pilason sa Don Salvador Benedicto Hospital sa La Carlota apang ginsaylo sa ciudad sang Bacolod.
May yara sang narecover ang mga police nga duha fired cartridges sang 45 caliber pistol sa crime scene.
Ginalantaw sang Pontevedra Municipal Police Station nga daan nga hiligut-anon bangud sa land dispute ang rason sa pagluthang sa mga biktima.
Suno kay Magbanua, may yara sang kaso nga pagpanglabo ang suspetsado.
