BACOLOD CITY – Pila ka mga salakyan kag kagamitan ang naguba matapos nasunog ang isa ka building sang Department of Education Division of Kabankalan City sa Negros Occidental kaina sang hapon.
Sa interview sang Bombo Radyo Bacolod kay Mayor Isidro Zayco sang Kabankalan City, nakita sang mga residente nga naga-aso ang Accounting Office gani gilayon nga nagresponde ang Bureau of Fire Protection.
Magluwas sa madamo nga mga papeles, ginkaon man sang kalayo ang mga laptop, Samurai nga service vehicle sang Division Office kag duha ka motorsiklo.
Nahibaluan nga wala sang mga maestra diri sang nagluntad ang insidente bangud natapos na sila sa pagpanglimpyo kadungan sang Brigada Eskwela.
Maswerte naman nga napalong gilayon ang kalayo matapos nagbulig ang mga firetrucks nagikan sa kaiping nga banwa sang Cauayan, Ilog kag ciudad sang Himamaylan.
Ginahibalo pa sang BFP kun ano ang gintunaan sang kalayo samtang aminado naman si Zayco nga daan na ang nasambit nga building.
