Gin-athag sang National Task Force on the West Philippine Sea nga ang mga barko sang China ang naghimo sang delikado nga mga maneuvers kaangay sang pagbunggo kag pagbutong samtang nagpatigayon sang rotation and resupply (RoRe) mission ang mga barko sang Pilipinas sa Ayungin shoal sang Lunes.
Ginpahayag sang Task Force sa isa ka statement nga nagpatigayon sang delikado nga maneuvers ang mga barko sang People’s Liberation Army-Navy (PLA-N), China Coast Guard (CCG) kag Chinese Maritime Militia (CMM).
Kasubong man, may yara sang isa ka Pilipino nga suldado nga reported nga nasamaran kasunod sang pagbunggo sang Chinese vessel sa barko sang Pilipinas.
Santo sa masaligan nga source, nagpatigayon sang medical evacuation sa bahin sang Pilipinas sa nasamaran nga suldado kadungan sang resupply mission kag ginahibalo pa sa karun ang sitwasyon sini.
Kadungan sini, hugot nga ginkondenar sang task force ang ginatawag sini nga ilegal, agresibo kag reckless actions sang mga barko sang China nga nagbutang sa kabuhi sang mga personnel sang Pilipinas sa delikado kag naghalit sa barko sang pungsod nga maathag nga paglapas sa international law partikular na sa UNCLOS kag 2016 Arbitral Award.
Nagpakita man sang pagpugong ang mga tropa sang Pilipinas kag professionalism, naglikaw man nga maglala pa ang tensiyon kag nagpadayon sa ila nga mission sa pihak sang ilegal kag agresibo nga mga tikang sang Chinese maritime forces.
Committed man ang Pilipinas sa paghimo sang matawhay kag responsable nga mga tikang nga nasanto sa international law.
Bilang isa naman ka miyembro sang international community ang China, ginalauman sang Pilipinas nga pareho man ang himuon sang pihak nga bahin.
Nagapabilin man nga wala nagalingkang ang AFP kag PCG sa pagpanindugan sa soberaniya, sovereign rights kag jurisdiction sang atun nga pungsod sa West Philippine Sea.
Ginhimo sang Task force ang pahayag matapos nga basulon sang China Coast Guard nga ang barko sang Pilipinas ang nagpalapit sa Chinese vessel sa indi proffesional nga paagi nga nagresulta sa pagbungguanay.
Ginpahayag man sang China nga ang barko sang Pilipinas nga ilegal nga nagsulod sa kadagatan sa Ayungin shoal kag ginbalewala ang makapila ka beses nga paandam sang China.
