Ginkumpirmar sang gobernador sang Negros Occidental nga isa sa 34 ka mga Overseas Filipino Workers (OFWs) nga nastranded sa Cebu kag nakapauli nagligad nga adlaw sa probinsya ang ginkuhaan sang swab sample matapos mangin reactive sa rapid test.
Sa press conference nga ginpatigayon, ginpahayag ni Lacson nga nagapabilin karon sa Provincial Healing Center sa EB Magalona ang 35 ka mga OFWs.
Kinahanglan nga kumpletuhon sang mga ini ang 14-day home quarantine samtang hulaton naman sang isa ka OFW ang swab test result sini kun positibo siya sa coronavirus disease 2019 (COVID-19).
Ginkumpirmar man ni Lacson nga may yara karon sang anom ka mga empleyado sang Philippine Airlines nga naka-quarantine sa Mambukal Resort matapos nag-hire ang Canadian government sang chartered plane agud nga kuhaon ang mga Canadian nationals diri sa Negros Occidental.
Kahapon, may nakatalana man nga pag-abot sang 45 ka mga construction workers nagikan sa Iloilo.
Suno kay Lacson, ipaidalom man ang mga ini sa 14-day quarantine sa Mambukal Resort.
