Sa ikaduha nga kahigayunan nga pagtuyo sa iya kabuhi, wala nakaluwas ang miyembro sang Bureau of Jail Management and Penology (BJMP) matapos gin-ambush sa Purok Katipunan, Barangay Cabug, Bacolod City, Biyernes sang gab-i.
Ang biktima nga si Jail Officer 1 Jayvee Jayson Vargas ang nagamaneho sang pick-up kag nagsugat sa iya nga amay sa New Negros Coliseum sa Barangay Pahanocoy. Kaupod ni Vargas ang tatlo niya ka mga pakaisa.
Sang pabalik na sa Barangay Handumanan alas-11:50 sang gab-i, gin-ambush ini sang mga suspetsado nga nagasakay sa tatlo ka motorsiklo kag ginapahayag nga may nagasakay pa sa Toyota Innova.
Ginpasundan pa palupok sang mga suspetsado ang pick-up tubtub nga nagbunggo sa kusina sang balay sang pamilya Espital.
Bangud sa pilas sa ulo kag iban nga bahin sang lawas, gilayon nga ginbawian sang kabuhi si Vargas.
Napilasan man ang pakaisa sini nga si Gian Philip Yoro nga nagapungko sa front seat samtang hilway naman ang amay sini nga si retired Senior Jail Officer 2 Joeby Vargas kag duha ka iban pa nga pakaisa.
Narekober sa crime scene ang mga empty shells sang .45 caliber pistol, M16 kag M14 rifle.
Sa interview sang Bombo Radyo kay Police Lt. Jun Pastrana, commander sang Police Station 9, ginapadalman pa ang imbestigasyon sa krimen kag indi madula ang posibilidad nga ang jail officer mismo ang target sang mga suspetsado.
Ginalantaw man ang anggulo nga may kaangtanan ini sa iligal nga druga.
Si Vargas ang assigned sa regional office sang BJMP Region 6.
Ini na ang ikaduha nga pag-ambush sa jail officer. Sang Abril 5, 2019, ginpaarakan man ini sang luthang sang riding-in-tandem suspects samtang pagwa sa gate sang BREDCO Port apang sa kamot lang ang iya igo. Sang amo nga tion, nagapungko sa passenger seat si Vargas kag manghod niya nga babayi ang nagamaneho sang pick-up. Sang Abril, assigned ang biktima sa Metro Bacolod District Jail Annex sa Handumanan apang ginsaylo ini sa BJMP regional office kadungan sang reshuffling sang tinalikdan nga binulan.
