Natalana nga i-endorso sang alkalde sang Kabankalan City ang pagdeklarar sang ciudad sang state of calamity kasunod sang epekto sang nagluntad nga pagbaha bangud sa pag-ulan dala sang Bagyong Crising.
Sa interview sang Bombo Radyo Bacolod kay Kabankalan City Mayor Benjie Miranda, nagdangat sa 15 ka barangay ang nag-evacuate sa ciudad sang Kabankalan bangud sa nagluntad nga pagbaha kag temporaryo nga nagtinir sa 26 ka evacuation centers.
Ang numero sang nag-evacuate ang nagdangat sa 1468 ka mga individuals santo sa data sang Kabankalan City Social Welfare and Development Office.
Pila sa mga Barangay nga apektado amo ang Barangay Talubangi, Daan Banwa, Biniquil, Hilamunan, Camansi kag Barangay Orong.
Suno sa alkalde nakahinun-anon naman ini Sangguniang Panlungsod kag nag-instruct nga i-convene ang DRRM Council sang ciudad para sa rekomendasyon sang deklarasyon sang State of Calamity sa ciudad bangud sa epekto sang Hangin Habagat nga ginpabaskog sang Bagyong Crising.
Ginalantaw nga sa Lunes maendorso sa City Council ang rekomendasyon deklarasyon sang State of Calamity.
Ginatipon pa sa karun sang ciudad ang tanan nga data bilang suporta sa nasambit nga deklarasyon kag dugang pa nga indi lang man tawo ang apektado kundi pati na ang mga kasapatan kag mga uma nga ginakuhaan ang pangabuhian sang mga pumuluyo.
