Nakapauli na kaina sang aga ang mga nag-evacuate kasunod sang engkwentro sa tunga sang militar kag New People’s Army sa Brgy Salamanca, Toboso, Negros Occidental sang Domingo, Abril 19.
Sa interview sang Bombo Radyo Bacolod kay Toboso Municipal Mayor Richard Jaojoco, kaina lamang sang aga nakabalik ang pumuluyo matapos mahatagan sang green light ukon pahanugot sang militar.
Madumduman nga una nga ginpahayag ni Jaojoco kahapon nga mahimo nga makabalik na ang mga pumuluyo sang udto, apang ginalantaw nga nag-extend ang clearing operation sa encounter site.
Samtang sa 19 ka mga NPA members nga napatay, 10 ang yara sa punerarya sa banwa sang Toboso, samtang ang siyam ang gindala naman sa punerarya sa Escalante City.
Suno kay Jaojoco, sa 10 nga yara sa ila, anom na ang ginkilala sang ila nga pamilya.
Duha naman sa mga napatay nga NPA members ang natumod nga tumandok sang Toboso nga ginalakipan ni Roger Fabillar, ang commanding officer sang North Negros Front, nga may patong sa ulo nga P1 million, nga residente sang Sitio Malig-on, Brgy Bandila, Toboso; kasubong man si Roel Sabillo, 19 anyos, residente sang Brgy Tabunac, Toboso.
Sabat naman sang municipal government ang pagbalsamar kag ang lungon sang mga biktima.
Samtang saluon man sang banwa ang pagpalubong sang mga napatay nga NPA members nga indi maclaim sang ila nga pamilya.
Tubtob lamang sa lima ka adlaw nga bulong para sa pagpreserve sang bangkay ang inisyal nga ginsabat sang banwa, apang nakadepende pa sa militar kun tubtob san-o patiniron sa punerarya ang mga bangkay.
