Kalabanan sa mga nahalitan sang sunog sa Purok Magti-ayon, Barangay 10, Bacolod City kaina sang kaagahon ang wala gid sang may nasalbar nga kagamitan.
Sa interview sang Bombo Radyo Bacolod kay Punong Barangay Melvin Bravo, 28 ka pamilya ukon 99 ka indibidwal ang nahalitan sa sunog kun sa diin 16 ka totally kag tatlo ka partially damaged nga mga balay, samtang may apat naman ka renters kag lima ka sharers.
May isa naman ka senior citizen nga napilasan matapos makalapak sang lansang sa pagtinguha nga makaluwas sa sunog.
Pila sa mga evacuees ang yara sa karun sa Barangay Hall samtang may iban naman nga nagtinir sa ila mga himata.
Suno kay Bravo, electrical in nature ang sunog bangod una na nga ginreklamo sang mga residente ang nagaspark nga linya sang kuryente apang wala nahimuan sang tikang.
Samtang dako na ang kalayo sang may nakatalupangod nga residente gani ini ang madasig naglapta sa mga pamalay nga human sa light materials.
Pasalig ni Bravo nga ila atipanon ang mga evacuees samtang ginahulat pa nga maproseso ang mga kinahanglan nga financial assistance gikan sa Bacolod City government nga magamit sang mga residente sa pagbangon.
Kalakip sa wala gid sang may nasalbar amo si Mary Jane Cabanag matapos natupok sang kalayo ang ila duha ka panalgan nga balay.
Suno diri, nagakatulog ang mga ini sang may nagpamalpag sa ila nga dingding, kag nakibot na lamang ini nga yara na sa dingding sang ila balay ang kalayo.
Una gid sini nga ginseguro nga maluwas ang mga kabataan.
Suno diri, antes paman sila makagwa, una na nga nalamon sang kalayo ang ibabaw nga bahin sang ila balay.
Kalakip sa nasunog ang gintipon nga kwarta sang iya hinablos nga ipadala pa kuntani sa iloy sini.
Walo sila nga nagapuyo sa balay, apang ang iya bata kag hinablos sini ang lunsay yara sa ila ginatrabahuan nga spa sang natabo ang sunog.
Pahayag ni Cabanag nga nag-ayo na lamang ini sa iya isa pa ka hinablos nga didto makatinir bangod mabudlay para sa ila kun magtinir sa Barangay Hall ilabi na nga may person with disability (PWD) sa ila pamilya.
