Nagdangat sa P1.4 million ang estimated damage sang natabo nga sunog sa Purok Kagaykay, Barangay 2, Bacolod City.
Sa interview sang Bombo Radyo Bacolod kay Fire Supt. Jenny Mae Masip, Fire Marshal sang Bacolod City Fire Station, ang sunog ang nagdangat sa 4th alarm kun sa diin 73 ang totally damaged kag walo ang partially damaged.
Ang kalayo ang ginalantaw gikan sa balay ni Monaliza Magbanua, apang ini ang madugay na nga gin-abandonar.
Duha ka bulan pa lamang sang maglesinsya si Alyas Waldo sa balay, matapos maglesinsya kay Magbanua.
Sa inisyal nga imbestigasyon si Waldo ang masami nga magsunog sang paper egg tray nga ginagamit sini nga improvised insect repellant bangod sa madamo nga lamok.
Ini ang makapila naman nga ginreklamo sang mga kaingod bangod sa aso ilabi na nga may mga ginahapo nga kabataan.
Kaina sang kaagahon, liwat nga nagtutod sang egg tray si Waldo nga naglab-ot sa carpet kag gintunaan sang sunog.
Wala na makita si Waldo matapos ang insidente, kag wala man sang may nakahibalo natuhoy sa mga personal details sini bangod sa masami gab-i lang ini sa balay.
Indi man makabig nga arson ang natabo bangod wala man ginhungod ang pagpanunog.
Panawagan na lamang ni Masip sa mga nagapanag-iya sang balay nga mangin responsable kag seguruhon nga wala sang makatuga sang sunog antes biyaan ang mga balay.
