BACOLOD CITY — Talakayon sa hearing sang Senado subong nga adlaw ang kaso ni Josie Perez-Lloren sang banwa sang Murcia nga napatay duha ka semana matapos nga nakabalik ini halin sa pungsod Kuwait.
Ala-1:00 sang hapon, patigayunon sang Senate Committee on Labor, Employment and Human Resources Development kag Committee on Foreign Relations ang hearing tuhoy sa pagkapatay sang mga OFWs.
Sa interview sang Bombo Radyo, ginpahayag ni Migrante Negros coordinator Monina Gulmatico nga itingob ini sa hearing sang kaso ni Joanna Daniela Demafelis nga ginpatay kag gintago sa freezer sa Kuwait.
Suno kay Gulmatico, ginduso sang Migrante International nga itingob nalang ang kaso ni Lloren sa imbestigasyon sa kamatayon ni Demafelis.
Pamilit ni Gulmatico, pareho lang nga maltreatment ang ginhimo sa duha ka Pinay OFW bangud sila ang ginsakit sang ila mga amo.
Samtang, ginkumpirmar naman sang utod ni Josie nga si Stella Perez-Duran nga ginhambalan nila sang una ang OFW nga magpauli nalang bangud nakasugid ini nga mapintas ang iya amo apang nagpadayon ini sa pagtrabaho agud nga makatipon sang kwarta.
Nagpanugyan pa ini sa iya mga himata nga sila ang maga-reunion sa tion nga makabalik na ini nagikan sa Kuwait.
