Wala sang ginatan-aw nga resurgence sang African Swine Fever (ASF) sa karon, samtang nagbalik na ang kapag-on sang hog industry sa Negros Occidental.
Sa interview sang Bombo Radyo Bacolod kay Negros Occidental Provincial Veterinarian Dr. Placida Lemana, yara na sa mas maayo nga kahimtangan ang industriya sang baboy matapos ang grabe nga dalit nga gin-agyan sini sang tinalikdan nga tuig.
Suno diri, normal lamang ang mga gakaeksperyensyahan sang mga kasapatan kaangay sang lupot, hilanat, kag sip-on bangud sa mga feeds nga ila ginakaon ukon mga contaminated nga hilamon.
Padayon lang ang pagmonitor kag isrikto nga pagpatuman sang biosecurity measures sang ASF task force sang Negros Occidental.
Dugang pa niya, padayon ang blood testing sa mga baboy sa nagkalain-lain nga lugar bilang kabahin sang ASF surveillance program sang probinsya.
Suno diri, indi lang baboy ang ginatan-aw sang task force, nagatsekyar man sila sang iban nga balatian sang kasapatan kaangay sang sip-on sa manok nga sarang man mabulong kun may early detection.
Importante gid ang gilayon nga intervention halin sa district veterinarian agod malikawan ang paglapta sang balatian.
Padayon ang panawagan sang otoridad sa mga hog raisers kag pumuluyo nga mangin mabinantayon, magtuman sa mga ginapatuman nga patakaran, kag magreport gilayon kon may makita nga balatian sa kasapatan, agod mahatagan sang atensyon kag matapna ang paglapta sang balatian.
