Kapin 894 ka mga pasahero nagikan sa Metro Manila ang nag-abot sa Negros Occidental sakay ang Saint Michael nga barko sang 2Go sang Sabado.
Sa interview sang Bombo Radyo kay Coastguard Station Commander Negros Occidental Colonel Jansen Benjamin, ang barko ang nagikan sa Manila, nagdulog sa Iloilo kag nagrekta sa Bacolod City.
Suno sa iya, kun wala sang community quarantine, mabyahe kuntani liwat ini sa Manila apang bangud may ginapapanaog nga quarantine sa pungsod, ginkanselar ang byahe kag mga cargo nalang ang unod sini pabalik.
Suno kay Benjamin, sa barko pa lang, gin-anunsyar na sa mga pasahero nga pag-abot sang mga ini sa Bacolod, kinahanglan nila nga magpaidalum sa 14 days home quarantine.
May yara naman sang face-mask, gloves kag hand sanitizers ang mga pasahero pagpanaog sang mga ini.
Kaupod sang Philippine Coastguard sa pag-akomodar sang nasambit nga mga pasahero ang Inter-Agency Task Force Against Coronavirus Disease sang ciudad, City Health Office kag Philippine National Police Maritime Group.
