Nagpatigayon kahapon sang hapon sang march rally ang kapin sa 1,000 nga mga manunudlo sa panawagan nga pagpasaka sang sweldo kag pagsuporta sa kinamatarong sang mga kababainhan nga manunudlo kadungan sa International Women’s Day.
Sa interview sang Bombo Radyo Bacolod kay Richard Gelangre ang presidente sang Bacolod City Public School Teacher’s Federation (BCPSTF), ang march rally nga ginpatigayon ang nagapanawagan sa Department of Budget and Management (DBM) nga mahatagan man sang pagtamod ang panawagan sang mga manunudlo nga salary increase ilabi na sa karun nga nagsaka ang presyo sang mga balaklon.
Suno diri, ginapanawagan sang mga ini nga ang P27,000 nga sweldo pasakaan sa P50,000 kun sa diin tuig 2022 pa ang ulihi nga pagpasaka sang sweldo.
Pahayag ni Gelangre, indi basta-basta ang trabaho sang mga manunudlo, magluwas sa pagtudlo, may yara pa sang mga reports nga ginapasa, mga classroom nga atipanon kag mga programa nga dapat sundon, kag ang manubo nga sweldo ang nagadugang pa gid sa pangabudlay sang mga ini amo nga kalabanan sa mga manunudlo ang nagadesisyon nga magtrabaho na lamang sa abroad.
Sa pihak nga bahin, suno kay Gelangre, ang pagkansela sang klase kahapon bangod sa tuman ka init ang husto lamang, apang mas maayo suno diri kun ini ang ideklarar isa ka adlaw antes ang suspension agud nga indi na maghalin ang mga estudyante sa ila nga mga panimalay, indi kaangay kahapon nga ginsuspende ang klase bangod sa tuman ka init apang iban sa mga kabataan ang wala nagpauli kag naglagaw lamang.
