Ginapakamaayo sang hepe sa Bacolod Police Station 9 nga ginpat-inan sang foreman sa ginaconstruct nga gasoline station sa Purok San Jose 2, Barangay Sum-ag, ang plate number sang salakyan sang mga hold-upper nga nagsulod sa ila.
Sa interview sang Bombo Radyo Bacolod kay Police Captain Michael Tuburan, nareport sa ila ang insidente kapin alas-3:30 na sang kaagahon.
Ang apat ka mga suspek ang sakay sa itom nga Innova, wala pa makilala, kag ginapahayag maniwang ang panglawason.
Suno diri nataban sang mga suspetsado ang duha ka cellphone nga nagabalor P10,000 kag P4,000 kasubong man ang isa ka wallet, nga naga-unod sang mga Identification cards sang biktima.
Suno kay Tuburan, sang Marso 12, may pagpanghold-up man nga natabo kapin alas-10:00 sang gab-i sa Tomaro Road, Purok Cabugwason, Barangay Cabug, Bacolod City kun sa diin mag-asawa ang biktima.
Ang mga suspetsado ang nakasakay naman sa maroon nga Innova SUV.
Suno diri, indi pa nila matumod kun may kaangtanan ang duha ka kaso, apang ginapakamaayo na lamang ni Tuburan nga natandaan ang plate number sang salakyan sang holdupper kaina sang aga.
Ini ang iya naman nga ginaverify sa Land Transportation Office (LTO), agud matumod kun sin-o ang tag-iya, nga makabulig sa pagtumod sa mga suspetsado.
Pahanumdom ni Tuburan sa mga pumuluyo nga kun mahimo, temprano pa nga magpauli.
Dugang pa sini nga indi man dapat idisplay ang mga cellphone kun yara sa dalanon, nga ila man nga ginasaway kun makita.
Kun nagatrabaho, dapat nga magpanilag man sa palibot kag kun luyag lamang nga magtambay, panugyan ni Tuburan nga sa ila na lamang estasyon.
Pahanumdom sini nga kun may mamutikan nga makaduluda, magcontact lamang sa ila sa hotline number nga 09-9859-874-78.
