Ginsuspend ang klase sa ciudad sang Bacolod subong nga adlaw bangod sa makusog nga huyop sang hangin kag pag-ulan nga dala sang bagyo Kristine.
Sa interview sang Bombo Radyo Bacolod kay Barangay Singcang Airport Punong Barangay Atty. Caesar Distrito, ginsuspend ni Bacolod City Mayor Alfredo “Albee” Benitez ang klase sa pre school tubtob senior high school sa public kag private schools apang ang college naman ang nakadepende na sa ila school administrations.
Ang kanselasyon sang klase ang kasunod man sang rekomendasyon sang Bacolod City Disaster Risk Reduction Management Office.
Suno kay Distrito, apisar nga ginbatak na ang signal no. 1 sa probinsya sang Negros Occidental, ginpakamaayo na lamang nga isuspend ang klase agud nga hilway ang mga estudyante.
Dugang pa sini, sa bahin sang Barangay Singcang Airport may yara sang 56 ka mga balay nga partially damaged matapos nga magguba ang mga atop kag dingding kag 13 ka pump boat ang nagkalaguba man.
Panugyan sini sa tanan nga pumuluyo sang Bacolod ilabi na sa mga naga-istar sa coastal areas kag flood prone areas nga maghalong kag indi magduha-duha sa pag-evacuate kun kinahanglan.
Magluwas sa Bacolod City, suspendido man gihapon subong nga adlaw ang face-to-face classes sa Talisay City, Silay City, Sipalay City, Himamaylan City, Bago City, La Carlota City, Escalante City, Kabankalan City, Cadiz City, La Castellana, Ilog, EB Magalona, Valladolid, Binalbagan, Pulupandan, Pontevedra, Isabela, Don Salvador Benedicto, Murcia, Manapla kag Cauayan.
Samtang ginhatag naman ni Victorias City Mayor Javi Benitez sa mga school heads ang desisyon, kasunod sang nauna nga announcement nga magabalik na ang klase.
