Kaangay sang iban nga kongresista, ginkalipay man ni Negros Occidental 5th District Congressman Atty. Dino Yulo ang pag-abrubar sang senado sa 3rd and final reading sang Bill No. 2507, ukon Negros Island Region Act nga nagaduso nga mangin isa ka rehiyon ang isla.
Sa interview sang Bombo Radyo Bacolod kay Atty. Yulo, ang pirma na lamang sang presidente ang hulaton agud mangin layi ang nasambit nga hagna.
Suno kay Yulo, nalipay ini sang naaprubahan ang hagna bangud ang pagduso sang Negros Island Region ang isa man sa nangin campaign promise niya sadto.
Suno kay Yulo, dako ang interest sang Quinto Distrito sa Negros Island Region, bangud lima sa anum ka banwa sini ang naga-angot sa Negro Oriental, samtang may yara sang gate ways ang Occidental kag Oriental kag nalakip diri ang La Castellana-Canlaon Road nga ginagamit man sadto.
Suno diri, nagdugang pondo ang opisina sini para sa pag-ubra sang dalan nga ginalakipan sang bag-o lamang natapos nga Isabela-Sikatuna-Luz, Guihulngan Road kag ang sa subong nga tuig ginpondohan naman sang opisina sini ang Himamaylan-Carabalan-Tayasan Road.
Ginbutangan man ang dalan sa nababaw nga bahin sang Moises Padilla, isa ka Geographically Isolated Detached Barangay ang Macagahay nga magalusot man sa Guihulngan, Negros Oriental.
Suno kay Yulo, nakahibalo naman ang tanan nga kun may dalan, may yara sang economic activities padulong sa pag-umwad kag kun may pag-umwad na sunod naman nga magaluntad ang katawhay nga luyag sang mga pumuluyo.
Gani dako ang pagpasalamat sini sa kasubong niya nga mamalidha nga nagpangabudlay sa pagduso agud maaprubahan ang hagna para sa NIR.
Ginalantaw nga mahimo isa sa pagabutangan sang regional offices sang government agencies kaangay sang DPWH amo ang ciudad sang Kabankalan nga natung-an sang Oriental kag Occidental.
