BACOLOD CITY — Nagnubo ang konsumo sang mga pumuluyo sang Negros Occidental sang karne sang manok kasunod sang bird flu outbreak sa probinsya sang Pampanga.
Sa interview sang Bombo Radyo Bacolod, ginpahayag ni Dr. Renante Decena, provincial veterinarian sang Negros Occidental, nga apektado gihapon sang bird flu scare ang mga Negrosanon apisar pa nga ginpaathagan man ang mga ini nga indi apektado sang virus ang probinsya.
Bangud sini, nagnubo man ang presyo sang free range chicken bangud diutay ang nagabakal.
Samtang, nagsaka naman suno kay Decena ang presyo sang itlog bangud nagapadala pa sang supply ang Negros Occidental sa isla sang Panay.
Sa masunod nga semana, pagalantawon sang PVO kun kamusta ang presyohanay sang karne sang manok sa mga merkado sa Bacolod kag sa probinsya matapos nga gindula na sang Department of Agriculture ang shipment ban sang poultry products nagikan sa Luzon.
