Lalaki nga ginakilala bilang “Escape King,” liwat nakapalagyo sa Opera maximum security prison sa Milan, Italy

Isa ka priso nga lalaki sa Albanya nga nakilala bilang “Escape King” ang nakapalagyo liwat sa prisohan sa Milan, Italy nga may yara sang Opera maximum security.

Ang pagpalagyo ni Toma Taulant ang kaangay sang makita sa Hollywood Movie.

Si Taulant nga natalana makagwa sa presohan sa tuig 2048 ang naggamit sang isa ka metal file nga iya ginkuha gikan sa workshop sang prisohan nga wala gid matalupangdan.

Ini ang gingamit ni Taulant para ma-utod ang metal bar sa iya nga selda kag naghimo sang improvised nga lubid gamit ang mga bedsheet.

Nakuhaan sang camera ang iya paghulag apang ang alarm system ang wala gid naghuni.

Ginalantaw nga ang pagpalagyo sang nasambit nga priso ang nati-on man sa pagbaylo sang gwardiya.

Ang nakakuha gid sang atensyon sang mga tawo amo ang reputasyon ni Taulant bilang isa ka eksperto sa pag-eskapo bangod apat na niya ini ka beses nga ginhimo sa magkatuhay nga prisuhan, kun sa diin isa sa paagi nga iya ginhimo agud makapalagyo amo ang paggamit sang “human pyramid” sang ini ang nagpalagyo sa prisuhan sa Belgium.