Nakilala na ang lalaki nga nasapwan nga wala na sang kabuhi nga gin-alegar gin-salvage sa Purok Yap, Barangay Alangilan, Bacolod City kaina sang aga.
Sa interview sang Bombo Radyo Bacolod kay Police Major Mark Joel Reclamado, station commander sang Bacolod Police Station 5, nasapwan ang lalaki kapin alas- 6:00 ang takna kaina sang aga kun sa diin may duct tape ang nawong sini kalakip ang baba.
May nakita man nga isa ka igo sang bala sa ulo sang biktima kag ang lawas sini may yara sang madamo nga lagob.
IN VIDEO: alleged victim of salvage in Barangay Alangilan, Bacolod City
Nagapos man ang kamot kag tiil sini sang duct tape kag may karton nga nakita nga may nakasulat nga “Winston bauang ikaw dason pusher”.
Nagasuksok ini sang puti nga t-shirt kag nakashort sang stripes nga blue, itom kag puti, kag may tattoo sa duha ka kamot.
Ginabanta nga naga-edad ini sang 30 anyos kag may kataason nga 5’5.
Suno kay Reclamado, posible nga kaina sang kaagahon ginbilin ang bangkay sang biktima sa area.
IN VIDEO: alleged victim of salvage in Barangay Alangilan, Bacolod City
Samtang, may nakuha man nga lima ka sachet sang white crystalline substance sa bulsa sini nga ipatsekyar pa kun ini bala illegal nga druga.
Ginpahayag sang nakakita sa bangkay nga indi residente sang Purok Yap ang bangkay nga nasapwan.
Suno kay Jomarie Barrios, nakita nila nga may dako nga butang nga ginbilin sa area kag pagpalapit didto nakita ang tawo nga wala na sang kabuhi kag ini ang indi man nila makilal-an.
