Liwat nga nadakpan sa drug buybust operation kag nakuhaan pa sang armas luthang ang anay pugante nga nagpabulig sadto sa Bombo Radyo Bacolod sa iya nga pagsurrender.
Sa interview sang Bombo Radyo Bacolod kay Police Captain Glenn Montaño, station commander sang Bacolod Police Station 2, ang subject person nga si AJ Vincent Montelibano, 21 anyos na sa karun, ang una na nga nadakpan sa drug buybust operation sang siya ang 16 anyos pa lamang.
Apang bangod minor, siya ang wala mapriso.
Sang Pebrero 18, 2021, siya ang liwat nga nadakpan sa pagbaligya man gihapon sang illegal nga droga kaupod sang isa pa ka person.
Apang sang Abril sa nasambitan nga tuig, si Montelibano kag ang isa pa ka priso ang nakapalagyo gikan sa kustodiya sang Bacolod Police Station 2.
Ini pinaagi sa paglukit sang kandado sang silda, kag paggwa lumpat sa likod nga pader sang Police Station tabok sa Andres Bonifacio Elementary School 2.
Siya ang nagpalagyo padulong sa banwa sang Valladolid agud magpanago, tubtob nga magcontact ang mga katiyaan sini sa Bombo Radyo Bacolod agud sila ang mabuligan sa pagsurrender sang ila hinablos.
Nahimo nga mabalik sa prisuhan ang suspect, apang ini ang naka-avail sang plea bargaining agreement.
Sang Pebrero subong nga tuig, nadakpan naman si Montelibano sa Anti-Illegal Gambling operation sang Bacolod Police Station 6.
Suno sa Station Commander, isa man ka bulan nila nga ginmonitor ang suspect tubtob nga liwat napatigayon ang drug buybust operation alas-9:37 kagab-i.
Narecover gikan diri ang 12 ka sachet sang suspected shabu nga ginabanta nagabug-at sang 41 gramos kag may Standard Drug Price nga P278,800.
Magluwas sa paglapas sa section 5 kag 11 ukon possession kag pagbaligya sa idalom sang Republic Act 9165 ukon Comprehensive Dangerous Drugs Act of 2002, si Montelibano ang mangatubang man sang kaso sa paglapas sa Republic Act 10591 ukon Comprehensive Firearms and Ammunition Regulation Act matapos makuhaan sang isa ka cal. 35 revolver kag apat ka live ammunition.
