Ginatudlo nga suspek sa lima nagkalain-lain nga shooting incidents sa Negros Occidental ang lalaki nga nasapwan patay sa kilid sang kampo sa Bloomfields Subdivision, Barangay Mandalagan, Bacolod City kahapon sang aga.
Madumduman nga nakilal-an nila ang biktima paagi sa tattoo sa nawala sini nga abaga nga pangalan sang iya live-in partner.
Ang biktima ang ginkilala nga si Jose Jun Codico, 36 anyos, residente sang Purok Pine Tree, Barangay Bata, Bacolod City.
Nasapwan ang bangkay sang biktima kapin alas-6:00 kahapon sang aga sa kilid sang kampo nga may duct tape sa mata kag may mga igo sang bala sa ulo.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, nakahibalo na ang pamilya kag gina-asikaso na ang pag-embalsamar kag pagpalubong sa biktima.
Suno kay Tapang, nagapadayon ang ila nga imbestigasyon kag naestorya naman nila ang pamilya sang biktima kag nagpasa naman sila sang request para sa autopsy sang bangkay.
Suno sa station commander mahimo may kaangtanan sa background sang biktima ang motibo sa pagpatay diri nga ginalakipan sang illegal nga druga kag malain nga konsekwensya sang ginhimo sini nga pagpangtiro.
Ang biktima ang isa sa mga suspek sa asod-asod nga shooting incidents sa probinsya nga ginalakipan sang isa sa Barangay Bata, isa sa Barangay Tangub, isa Barangay Tabunan, Bago City kag duha sa La Carlota City, kag ini ang ginatudlo nga imbulbado man sa illegal nga druga.
